Komunitatea eraikitzen, belaunaldiak lotzen

Komunitatea eraikitzen, belaunaldiak lotzen

Ikastolako festa arrakastatsua komunitatea indartzeko topagune bilakatu zen beste behin ere.

Atzo ospatu zen Ikastolako Festa, eta Ikastolako komunitateko kide ugari elkartu zituen egun berezi eta giro paregabean. Ospakizunak aukera paregabea eskaini zuen ikasle, familia, langile eta lagunen arteko harremanak sendotzeko eta komunitatea eraikitzen jarraitzeko.

Egun osoan zehar adin guztietarako jarduerak izan ziren. Txikienek haurrentzako jolasetan parte hartu zuten, eta DBHko ikasleek antolatutako tortila txapelketak ikusmin eta parte-hartze handia erakarri zuen. Horrez gain, elkartasun ekimenek ere protagonismo berezia izan zuten, ikastolaren balioak eta gizartearekiko konpromisoa agerian utziz.

Jardunaldiaren unerik hunkigarrienetako bat Batxilergoko ikasleei eskainitako aitortza ekitaldia izan zen. Urte luzez ikastolan hezi eta hazi ondoren, gehienek etapa berri bati ekingo diote datozen hilabeteetan. Ekitaldian zehar, Ikastolak eskerrak eman zizkien egindako ibilbideagatik eta etorkizunerako desiorik onenak helarazi zizkien. Era berean, gogorarazi zitzaien ikastola beti izango dela haien etxea, eta bertako ateak zabalik izango dituztela etorkizunean ere.

Festa giroan igarotako egunari amaiera emateko, ikastolako komunitateak afari batez gozatu zuen. Giro atsegin eta jatorrean, parte-hartzaileek eguneko bizipenak partekatu eta elkarrekin ospatzeko aukera izan zuten.

Balorazioa oso positiboa izan da, eta antolatzaileek eskerrak eman dizkiete festan parte hartu duten guztiei, haien inplikazioari eta konpromisoari esker ikastolako komunitatea gero eta sendoagoa baita. Egunak agerian utzi zuen, beste behin ere, ikastola hezkuntza-gune bat baino gehiago dela: pertsonak elkartzen dituen eta komunitatea eraikitzen duen espazioa.