Euskararen etorkizuna ehuntzen, elkarrekin eta norabide berean
2026-11-18
Euskararen biziberritzean eta hezkuntza-ereduaren indartzean urrats berriak egiteko, elkarrekin hausnartzeko eta etorkizuneko erronkei erantzuteko elkargune izan da Donostiako Kursaal jauregia. Bertan izan dira gure ikastolako kideak ere, Ikastolen 30. Jardunaldi Pedagogikoetan, Euskal Herriko eta nazioarteko hezkuntza-arloko 600 profesional eta arduradunekin batera.
Hezkuntzaren eta euskararen etorkizunak elkarrizketa, hausnarketa eta elkarlana eskatzen ditu. Ideia horren inguruan bildu dira aurten ere hezkuntza-komunitateko ehunka profesional Donostiako Kursaalen, Ikastolen 30. Jardunaldi Pedagogikoetan. Gure ikastolako kideak ere bertan izan dira, eguneroko hezkuntza-jardunetik harago begiratu eta etorkizuneko erronkei elkarrekin heltzeko asmoz.
Aurtengo jardunaldien ardatz nagusia murgiltze-eredua birpentsatzea eta indartzea izan da. Euskararen erabileran eta transmisioan bizi ditugun erronka berrien aurrean, murgiltze eredu integral baterako bideak aztertu dituzte, Euskal Herriko zein nazioarteko adituen eskutik.
Horrez gain, euskarak herri kohesiorako eta elkarbizitzarako elementu izaten jarrai dezan beharrezkoak diren estrategia, baliabide eta egiteko modu berriak ere izan dituzte hizpide. Izan ere, euskalduntzearen inguruko eztabaida hezkuntzaren eremura ere iritsi da, eta horrek guztion arteko hausnarketa eta elkarlana eskatzen ditu.
Jardunaldiek aukera eman digute gure hezkuntza-praktikei buruz hausnartzeko, beste esperientzia batzuk ezagutzeko eta partekatzen ditugun erronkei ikuspegi berrietatik begiratzeko. Badakigu etorkizuneko bidea ez dela bakarka egingo: euskararen aldeko konpromisoak, hezkuntza-komunitatearen inplikazioak eta elkarlan sare sendoak emango dizkiote indarra.
Gure ikastolatik ere bide horretan jarraituko dugu, ikasten, partekatzen eta eraikitzen. Euskaraz hezi, euskaraz bizi eta etorkizuna euskaratik eraikitzeko, elkarrekin egin beharreko bidea dugu aurretik.


