Itsas olatuen gozotasuna: Boga, boga proiektua Lehen Hezkuntzan

Lehen Hezkuntzako 2. mailako ikasleek Boga, boga proiektua burutu dute, eta horrekin euskal kostaldearen kultura, ohiturak eta tradizioak hurbiletik ezagutzeko aukera paregabea izan dute. Proiektuaren nondik norakoak jasotzen dituen bideoa duzue ikusgai ondorengo estekan.

Proiektuak hainbat jarduera eta esperientzia ezberdin bildu ditu, eta ikasleek ikaskuntza praktiko eta esanguratsua bizitzeko aukera izan dute.

Proiektuan egindako jarduerak:

• Armarriak eta Itsasontziak: ikasleek euskal kostaldeko herrien armarrien eta itsasontzien inguruko informazioa aztertu zuten. Horrez gain, beren itsasontzi propioak sortu eta asmatu zituzten, itsasoari buruzko ezagutza praktikoa barneratuz.
• Aitonaren Bisita: itsas gizonen bizitza eta ohiturak ezagutu zituzten, ikasle baten aitonak bertan kontatu zizkien istorio eta esperientzia pertsonalekin.
• Etxean egindako lanen aurkezpena: beren sormen lanak partekatzeko aukera izan zuten, eta horrela, ikaskuntza prozesuaren parte garrantzitsua den egindako lanen garrantzia azpimarratu zuten.
• Baleen garrantzia euskal historian: Aquarium-era bisita egin zuten, euskal itsas faunaren inguruko ezagutza hurbiletik barneratzeko.
• Arrain desberdinak aztertu: euskal kostaldeko arrainen azterketa egin zuten eta horretarako matematikako kontzeptuak ere landu zituzten, luzeraren eta prezioen arteko loturak ezarriz.
• Piratei eta kortsarioei buruzko ikaskuntza: piraten eta kortsarioen historia eta abenturak ikasi zituzten, Euskal Herriko itsasoan izan zuten garrantzia aztertuz.
• Getarira ibilaldia: Sirenen kondairak eta arrantzaleen kofradien mundua ezagutu zuten, eta esperimentuak egin zituzten itsasargiaren segurtasuna aztertuz. Gainera, sareak konpontzen ikasi zuten.
• Amaiera paregabea: Proiektua amaitzeko, ikasleek beraiek egindako itsasontziak uretaratu zituzten Izarraizko Ateko parkeko ur putzuan. 🌊🚤

Proiektu honek ikaskuntza eraginkorragoa izateko pauso garrantzitsua ekarri du berekin, ikasleen aurrezagutzak aktibatuz eta beraien inguruan gertatzen dena ikasteko aukera berriak eskainiz. Gainera, eginiko jarduera guztiek ikasleen ezagutzak eta erronkak gainditzeko gaitasuna handitu dute, eta ikaskuntza esperientzia honek gure inguruko kultura eta tradizioak ezagutzen lagundu die.