Txikien ametsak, gure izar gidari

Gabonetako magia nagusi Haur eta Lehen Hezkuntzako geletan. Apaingarriak diseinatu eta gelak apaindu dituzte.

Ikastolako txoko guztietan Gabonetako giroa da protagonista egun hauetan. Haur Hezkuntzan, ilusioa eta poza nagusitu dira; izan ere, ikasleak irrikan daude Olentzero eta Mari Domingiren etorreraren zain. Egun berezi hauek baliatuz, Gabonen benetako balioak —elkarlana, laguntasuna eta elkarri laguntzea— modu naturalean bizi eta praktikan jarri dituzte.

Azken asteetan, haurrek beren portaerarik onena erakutsi dute: elkarrekin jolas egin dute, esperientziak partekatu eta egunerokoan elkarri lagundu diote, gure komunitatea bereizten duten baloreak sendotuz. Ekintza berezien artean, Olentzero eta Mari Domingiri idatzitako gutunak nabarmendu dira. Haurrak emozioz eta ilusioz bete dira beren amets eta desioak paperera ekartzean, eta gutunak postontzian sartzeko momentuak benetako magia sortu du.

Bestalde, Kimu Proiektuak —adin desberdinetako haurren arteko elkarlanean oinarritutako ekimenak— protagonismo berezia hartu du Gabonetako ospakizunetan. Haurrek elkarrekin egindako jarduerek aberastasuna eta balio hezigarri ugari ekarri dituzte, hainbat adineko haurren arteko loturak estutuz.

Lehen Hezkuntzan ere, Gabonetako prestaketak lanez eta sormenaz bete dira. Ikasleek Olentzero eta Mari Domingiri ongietorri beroena egiteko apaingarri bereziak diseinatu dituzte, eskolako txoko guztiak kolorez eta festaz jantziz.

Oraindik badugu itxaroteko une apur bat gure lagunik berezienen bisitarako, baina bitartean, gure geletan Gabonetako poza, maitasuna eta ilusioa dira nagusi.