Artezkaritza taldea: Ikasturte honetan ere hainbat erronka ditugu aurretik

2024-25 ikasturtea hasi berri dugu eta Artezkaritza Kontseilua osatzen dugun guztion aldetik, ongi etorri beroena ikastolako guraso, langile eta ikasle guztioi.

Ilusioz ekin diogu aurtengo ikasturteari ere. Udan zehar Ikastolako txoko ezberdinak eraldatu ditugu ikasleen beharretara egokituz. Aurtengoan, hala ere, ikusgarriagoak diren berrikuntzak egin dira, eta ikastolaren behar berriei erantzutea dute helburu.

Besteak beste, aretoko sabaia berritu eta aterpea gehitu zaio. Gainera, jangelaren espazioa handitzeko lanak ere gauzatu dira. Azkenik, DBHko geletan ate irristariak kokatu dira. Ezin dugu aipatu gabe utzi, gure ikastolak izan duen auzolana. Ederra izan da guraso eta langileak ikastolan zehar ikustea zuen aletxoa jarriz. Mila esker!

Ikasturte honetan ere hainbat erronka ditugu aurretik. Kulturartekotasunaren inguruan lanketa integrala egiten jarraitzeko konpromisoa berresten dugu. Gainera, Kilometroen urtea da eta izpiz izpi barreiatu dugun argitasunaren frutiuak jasotzeko garaia iritsi da: herrigintzan sinesten duen eta euskararen arnasgune izaten jarraitzeko bere hautua berresten duen herria bilakatzea. Horiez gain, ikasturtean zehar sortzen diren beharrei ere erantzuten saiatuko gara. Ekinean elkarren berri izango dugulakoan agurtzen gara.

Besarkada bat!